باقرؔ نشانۂ غم و رنج و الم تو ہو

باقرؔ نشانۂ غم و رنج و الم تو ہو

چھوڑو کچھ اور بات کرو درد کم تو ہو

اے کشتۂ خلوص محبت بکار باش

لب پر شگفتگی نہ سہی آنکھ نم تو ہو

ہر دم رہے حدیث معنی سے ہم کو کام

ذکر خدا اگر نہیں ذکر صنم تو ہو

کچھ تو پئے شکست سکوت شب الم

گریہ سہی فغاں سہی کچھ دم بہ دم تو ہو

چشم غزال و حسن غزل کا بیاں رہے

کچھ ایسی بات جو پئے تسکین غم تو ہو

قانون باغبانیٔ صحرا تو لکھ چکے

عنوان زیست بھی کسی صورت رقم تو ہو

اک عمر تو نے ٹوٹے پیالوں پہ کاٹ دی

باقرؔ پئے شراب کوئی جام جم تو ہو