baqi hai tab-e-zabt na taqat fughan ki hai

baaqī hai tāb-e-zabt na tāqat fuġhāñ kī hai

hālat bahut saqīm dil-e-nā-tavāñ kī hai

āñkhoñ meñ josh hai kabhī tūfān nuuh kā

dil meñ mire taḌap kabhī barq-e-tapāñ kī hai

ai āh-e-nā-rasā tire naale haiñ be-asar

behtar yahī hai baat rahe jo jahāñ kī hai

hotā hai josh gar ye jo ab baat baat par

dil meñ mire ye choT ilāhī kahāñ kī hai

ai dil tujhe natīja-e-ulfat hai ḳhuub yaad

aur phir bhī aarzū tujhe kū-e-butāñ kī hai

jis ko samajh rahe haiñ vo bādal kī ik garaj

fariyād dardnāk kisī ḳhasta-jāñ kī hai

bulbul hai ḳhush ki baaġh meñ hai ḳhaak āshiyāñ

ye kaun jāntā hai ki miTTī kahāñ kī hai

sone diyā na shor-e-qayāmat ne qabr meñ

samjhā thā maiñ ki jaa.e ye amn-o-amāñ kī hai

rañg-e-shafaq se shaam ko miltā hai ye patā

ab āsmāñ pe gard mire kārvāñ kī hai

mansūr kī fanā hai baqā-e-sadā-e-haq

āvāz vādiyoñ meñ abhī tak azaañ kī hai

samjhā rahā huuñ dil ko nahīñ phir bhī e'timād

vo baat kah rahā huuñ jo un kī zabāñ kī hai

hai dil-gudāz yuuñ bhī mirī dāstān-e-ġham

tāsīr us pe kuchh mire tarz-e-bayāñ kī hai

'hāfiz' ye kā.enāt na ho jaa.e jal ke ḳhaak

baḌhtī huī tapish mire soz-e-nihāñ kī hai

baqi hai tab-e-zabt na taqat fughan ki hai

haalat bahut saqim dil-e-na-tawan ki hai

aankhon mein josh hai kabhi tufan nuh ka

dil mein mere taDap kabhi barq-e-tapan ki hai

ai aah-e-na-rasa tere nale hain be-asar

behtar yahi hai baat rahe jo jahan ki hai

hota hai josh gar ye jo ab baat baat par

dil mein mere ye choT ilahi kahan ki hai

ai dil tujhe natija-e-ulfat hai KHub yaad

aur phir bhi aarzu tujhe ku-e-butan ki hai

jis ko samajh rahe hain wo baadal ki ek garaj

fariyaad dardnak kisi KHasta-jaan ki hai

bulbul hai KHush ki bagh mein hai KHak aashiyan

ye kaun jaanta hai ki miTTi kahan ki hai

sone diya na shor-e-qayamat ne qabr mein

samjha tha main ki jae ye amn-o-aman ki hai

rang-e-shafaq se sham ko milta hai ye pata

ab aasman pe gard mere karwan ki hai

mansur ki fana hai baqa-e-sada-e-haq

aawaz wadiyon mein abhi tak azan ki hai

samjha raha hun dil ko nahin phir bhi e'timad

wo baat kah raha hun jo un ki zaban ki hai

hai dil-gudaz yun bhi meri dastan-e-gham

tasir us pe kuchh mere tarz-e-bayan ki hai

'hafiz' ye kaenat na ho jae jal ke KHak

baDhti hui tapish mere soz-e-nihan ki hai