باقی ہیں زندگی کے ابھی اور کام بھی

باقی ہیں زندگی کے ابھی اور کام بھی

لائی ہے ہجرتوں کے مسائل یہ شام بھی

میری انا سے مجھ کو اگر فرصتیں ملیں

اک خط لکھوں گا بھولنے والے کے نام بھی

تصویر زندگی کی پس پشت ڈال کر

لیتے ہیں اپنے آپ سے ہم انتقام بھی

ہر شے تھی دسترس میں مگر اس کے باوجود

آئے ہیں تیری بزم سے ہم تشنہ کام بھی

ہر چند بے ثبات ہے سو فیصدی مگر

لازم ہے زندگی کا ہمیں احترام بھی

اس شخص کی حیات کا کیا تذکرہ کریں

آئے نہ جو پڑوس کے لوگوں کے کام بھی