baqi na hujjat ek dam-e-isbaat rah gai

baaqī na hujjat ik dam-e-isbāt rah ga.ī

sābit kiyā jo us kā dahan baat rah ga.ī

kyā jald vasl-e-yār kī kam raat rah ga.ī

jo baat chāhte the vahī raat rah ga.ī

bad-nāmiyoñ ke Dar se vo milte haiñ gaah gaah

chorī-chhupe kī un se mulāqāt rah ga.ī

giryāñ vo huuñ jo abr-e-mizha kī jhaḌī lagī

muñh merā dekh dekh ke barsāt rah ga.ī

har-vaqt baat baat pe dete ho jhiḌkiyāñ

kyuuñ sāhab ab hamārī ye auqāt rah ga.ī

miltā nahīñ kisī se bashar koī be-ġharaz

matlab kī ab jahāñ meñ mulāqāt rah ga.ī

gardish meñ saath un āñkhoñ kā koī na de sakā

din rah gayā kabhī to kabhī raat rah ga.ī

vaa.iz ko apne rañg pe le aayā khīñch kar

aaj ābrū-e-riñd-e-ḳharābāt rah ga.ī

bāteñ sunā.īñ ġhairoñ ke aage jo yaar ne

farmā.iye phir aap kī kyā baat rah ga.ī

furqat meñ sabr-o-hosh to sab kuuch kar ga.e

par ek jaan morid-e-āfāt rah ga.ī

tauhīn-e-mai na kartī thī rindoñ meñ vā.izā

izzat tumhārī qibla-e-hājāt rah ga.ī

dil meñ to ḳhaak uḌtī hai zāhir meñ haiñ fidā

ab to munāfiqāna mulāqāt rah ga.ī

dene ke badle dete haiñ saa.il ko jhiḌkiyāñ

ye rah ga.e amiir ye ḳhairāt rah ga.ī

dil pā.emāl karne the raftār-e-nāz ko

ye chaal tujh se o but-e-bad-zāt rah ga.ī

āmāda jaan lene pe merī thī vo magar

kyā jāneñ kyuuñ ubhar ke tirī gaat rah ga.ī

duniyā se baḌh ke kaun hai harjā.ī dūsrā

do din na kis ke paas ye bad-zāt rah ga.ī

jo kuchh thā paas kar chuke sab nazr mai-farosh

ab mai-kashoñ kī qarz pe auqāt rah ga.ī

karnā thā naqd-e-hosh use nazr ai 'qalaq'

pīr-e-muġhāñ kī ham se mudārāt rah ga.ī

baqi na hujjat ek dam-e-isbaat rah gai

sabit kiya jo us ka dahan baat rah gai

kya jald wasl-e-yar ki kam raat rah gai

jo baat chahte the wahi raat rah gai

bad-namiyon ke Dar se wo milte hain gah gah

chori-chhupe ki un se mulaqat rah gai

giryan wo hun jo abr-e-mizha ki jhaDi lagi

munh mera dekh dekh ke barsat rah gai

har-waqt baat baat pe dete ho jhiDkiyan

kyun sahab ab hamari ye auqat rah gai

milta nahin kisi se bashar koi be-gharaz

matlab ki ab jahan mein mulaqat rah gai

gardish mein sath un aankhon ka koi na de saka

din rah gaya kabhi to kabhi raat rah gai

waiz ko apne rang pe le aaya khinch kar

aaj aabru-e-rind-e-KHarabaat rah gai

baaten sunain ghairon ke aage jo yar ne

farmaiye phir aap ki kya baat rah gai

furqat mein sabr-o-hosh to sab kuch kar gae

par ek jaan morid-e-afat rah gai

tauhin-e-mai na karti thi rindon mein waiza

izzat tumhaari qibla-e-hajat rah gai

dil mein to KHak uDti hai zahir mein hain fida

ab to munafiqana mulaqat rah gai

dene ke badle dete hain sail ko jhiDkiyan

ye rah gae amir ye KHairaat rah gai

dil paemal karne the raftar-e-naz ko

ye chaal tujh se o but-e-bad-zat rah gai

aamada jaan lene pe meri thi wo magar

kya jaanen kyun ubhar ke teri gat rah gai

duniya se baDh ke kaun hai harjai dusra

do din na kis ke pas ye bad-zat rah gai

jo kuchh tha pas kar chuke sab nazr mai-farosh

ab mai-kashon ki qarz pe auqat rah gai

karna tha naqd-e-hosh use nazr ai 'qalaq'

pir-e-mughan ki hum se mudaraat rah gai