baqi nahin jahan mein jaur-o-jafa ka zikr

baaqī nahīñ jahān meñ jaur-o-jafā kā zikr

lab par hai har bashar ke faqat karbalā kā zikr

hāthoñ meñ mere dekh ke tīr-o-kamān ko

taa.ir tamām karne lage badduā kā zikr

merī hudūd-e-fikr se bāhar haiñ shaiḳh jī

hāthoñ meñ jaam aur laboñ par ḳhudā kā zikr

shahr-e-adab ke saare qalam-kār thak ga.e

kāmil na ho sakā tirī nāzuk adā kā zikr

sab kuchh jahāñ meñ chhoḌ diyā ḳhaak ho ga.e

ye muḳhtasar hai aur sunā.ūñ anā kā zikr

muflis mire dayār kā ġhairat se mar gayā

ek roz bhī kiyā na kisī se ġhizā kā zikr

be-pardagī pe hone lagī hai p h d

baaqī nahīñ kitāb-e-hayā meñ hayā kā zikr

ahmaq bashar misāl bhī kutte kī lā.egā

hogā jahāñ-jahāñ bhī jahāñ meñ vafā kā zikr

jitne charāġh the sabhī dahshat se bujh ga.e

parvāne kar rahe the paroñ kī havā kā zikr

'mehvar' palaT na jaa.e mirī kashtī-e-hayāt

ik arsa ho gayā hai kiye nāḳhudā kā zikr

baqi nahin jahan mein jaur-o-jafa ka zikr

lab par hai har bashar ke faqat karbala ka zikr

hathon mein mere dekh ke tir-o-kaman ko

tair tamam karne lage baddua ka zikr

meri hudud-e-fikr se bahar hain shaiKH ji

hathon mein jam aur labon par KHuda ka zikr

shahr-e-adab ke sare qalam-kar thak gae

kaamil na ho saka teri nazuk ada ka zikr

sab kuchh jahan mein chhoD diya KHak ho gae

ye muKHtasar hai aur sunaun ana ka zikr

muflis mere dayar ka ghairat se mar gaya

ek roz bhi kiya na kisi se ghiza ka zikr

be-pardagi pe hone lagi hai p h d

baqi nahin kitab-e-haya mein haya ka zikr

ahmaq bashar misal bhi kutte ki laega

hoga jahan-jahan bhi jahan mein wafa ka zikr

jitne charagh the sabhi dahshat se bujh gae

parwane kar rahe the paron ki hawa ka zikr

'mehwar' palaT na jae meri kashti-e-hayat

ek arsa ho gaya hai kiye naKHuda ka zikr