bashinde haqiqat mein hain hum mulk-e-baqa ke

bāshinde haqīqat meñ haiñ ham mulk-e-baqā ke

kuchh roz se mehmān haiñ is dār-e-fanā ke

dil ḳhuuñ ho shab-e-vasl bhī hasrat meñ na kyūñ-kar

dekheñ na vo ḳhalvat meñ bhī jab aañkh uThā ke

farmā.iye ham se thī yahī shart-e-mohabbat

ḳhuub aap ne rusvā kiyā ġhairoñ meñ bulā ke

kūche meñ na aa.e koī maiñ jaan gayā huuñ

farmāte ho mujh se ye raqīboñ ko sunā ke

dil haath se kho jaatā hai kis taur se zāhid

to aap zarā dekh le us kūche meñ jā ke

ḳhāk-e-dar-e-jānāñ hai libās-e-tan-e-uryāñ

āshiq tire mohtāj nahīñ aur qabā ke

ham sar ke bal ā.eñge jo bulvāoge sāhab

gar ho na yaqīñ dekh lo tum chāho bulā ke

ho sāya-e-dīvār tumhārā jo mayassar

phir kyā kareñ farmā.iye saa.e ko humā ke

dil khol ke kar lījiye ai hazrat-e-dil sair

ham phir ke na phir ā.eñge is bazm se jā ke

tan ḳhaak meñ mil jā.egā ik roz hamārā

jī tan se nikal jā.egā mānind havā ke

bashinde haqiqat mein hain hum mulk-e-baqa ke

kuchh roz se mehman hain is dar-e-fana ke

dil KHun ho shab-e-wasl bhi hasrat mein na kyun-kar

dekhen na wo KHalwat mein bhi jab aankh uTha ke

farmaiye hum se thi yahi shart-e-mohabbat

KHub aap ne ruswa kiya ghairon mein bula ke

kuche mein na aae koi main jaan gaya hun

farmate ho mujh se ye raqibon ko suna ke

dil hath se kho jata hai kis taur se zahid

to aap zara dekh le us kuche mein ja ke

KHak-e-dar-e-jaanan hai libas-e-tan-e-uryan

aashiq tere mohtaj nahin aur qaba ke

hum sar ke bal aaenge jo bulwaoge sahab

gar ho na yaqin dekh lo tum chaho bula ke

ho saya-e-diwar tumhaara jo mayassar

phir kya karen farmaiye sae ko huma ke

dil khol ke kar lijiye ai hazrat-e-dil sair

hum phir ke na phir aaenge is bazm se ja ke

tan KHak mein mil jaega ek roz hamara

ji tan se nikal jaega manind hawa ke