baat bachchon ki thi laDne ko siyane nikle

baat bachchoñ kī thī laḌne ko siyāne nikle

phir ajab kyā hai ki bachche bhī laḌāke nikle

dhyān maañ rakhtī thī merā vo zamāne nikle

haiñ yuuñ ab roz savere se kamāne nikle

aam ke baaġh se jab se haiñ parinde ġhā.eb

ba.ad us ke kahāñ phir aam rasīle nikle

poTlī jis ke liye laḌtī rahīñ aulādeñ

maañ kī us poTlī meñ sirf jharoke nikle

ye to kal-yug hai kharā is meñ nahīñ haiñ koī

mujh ko shikva nahīñ sikke mire khoTe nikle

phir ġharīboñ kī shikāyat kā ḳhudā hāfiz haiñ

jab vazīroñ ke amīroñ hī se rishte nikle

gard jab saaf huī sab ne ye manzar dekhā

jo nazar aate the ūñche vahī baune nikle

ibtidā phir se hai ek aur safar kī 'ātish'

ba.ad marne ke bhale pairoñ se juute nikle

baat bachchon ki thi laDne ko siyane nikle

phir ajab kya hai ki bachche bhi laDake nikle

dhyan man rakhti thi mera wo zamane nikle

hain yun ab roz sawere se kamane nikle

aam ke bagh se jab se hain parinde ghaeb

baad us ke kahan phir aam rasile nikle

poTli jis ke liye laDti rahin auladen

man ki us poTli mein sirf jharoke nikle

ye to kal-yug hai khara is mein nahin hain koi

mujh ko shikwa nahin sikke mere khoTe nikle

phir gharibon ki shikayat ka KHuda hafiz hain

jab waziron ke amiron hi se rishte nikle

gard jab saf hui sab ne ye manzar dekha

jo nazar aate the unche wahi baune nikle

ibtida phir se hai ek aur safar ki 'atish'

baad marne ke bhale pairon se jute nikle