baat bah jaane ki sun kar ashk barham ho gae

baat bah jaane kī sun kar ashk barham ho ga.e

ik zarā koshish bhī kī to aur pur-nam ho ga.e

ye huā ma.amūl ki mānūs-e-ġham dil ho gayā

ham samajh baiThe hamāre dard kuchh kam ho ga.e

kaifiyat iz.hār-e-soz-e-dil kī kuchh aisī huī

aate aate lab talak alfāz mub.ham ho ga.e

vaqt kī chāragarī bhī dekhiye kyā ḳhuub hai

ġham davā meñ Dhal gayā aur zaḳhm mahram ho ga.e

gardishoñ ke abr kī ik buuñd tan par kyā girī

kal jo the sho.ala-sifat vo aaj shabnam ho ga.e

the hamāre ḳhuuñ ke qatre ḳhaak kī sūrat ḳhudā

tere naqsh-e-pā ko chhū kar āb-e-zamzam ho ga.e

dushmanī baḌhne kā yuuñ 'nāyāb' ġham ham ko nahīñ

haañ magar afsos ye hai dost kuchh kam ho ga.e

baat bah jaane ki sun kar ashk barham ho gae

ek zara koshish bhi ki to aur pur-nam ho gae

ye hua mamul ki manus-e-gham dil ho gaya

hum samajh baiThe hamare dard kuchh kam ho gae

kaifiyat izhaar-e-soz-e-dil ki kuchh aisi hui

aate aate lab talak alfaz mubham ho gae

waqt ki chaaragari bhi dekhiye kya KHub hai

gham dawa mein Dhal gaya aur zaKHm mahram ho gae

gardishon ke abr ki ek bund tan par kya giri

kal jo the shoala-sifat wo aaj shabnam ho gae

the hamare KHun ke qatre KHak ki surat KHuda

tere naqsh-e-pa ko chhu kar aab-e-zamzam ho gae

dushmani baDhne ka yun 'nayab' gham hum ko nahin

han magar afsos ye hai dost kuchh kam ho gae