بات بے بات پہ سب شور مچانے لگے ہیں

بات بے بات پہ سب شور مچانے لگے ہیں

سر پہ سورج ہے مگر دیپ جلانے لگے ہیں

ہم نے پلکوں پہ سجا رکھا تھا جن خوابوں کو

ایک اک کر کے سبھی خواب ٹھکانے لگے ہیں

جن کی شدت سے ضرورت تھی زمیں کو وہ لوگ

آسمانوں پہ زمیں چھوڑ کے جانے لگے ہیں

طنز سے ان کی طرف دیکھتی رہتی ہے یہ خلق

عشق میں سارا اثاثہ جو لٹانے لگے ہیں

دیکھتے دیکھتے کیا ہو گئی اپنی دنیا

جو ہنساتے تھے وہی لوگ رلانے لگے ہیں

ہم سے خوش دنیا ہے گھر والے بھی خوش ہیں ہم سے

شعر بھی کہتے ہیں پیسے بھی کمانے لگے ہیں

ہم سے کترا کے گزر جاتے تھے سب اہل نظر

اب جدھر جاتے ہیں وہ بھی ادھر آنے لگے ہیں

بادشاہی کا ہے ہم میں نہ فقیری کا ہنر

پھر بھی کیوں لوگ ہمیں ملنے کو آنے لگے ہیں