baat be-baat pe sab shor machane lage hain

baat be-bāt pe sab shor machāne lage haiñ

sar pe sūraj hai magar diip jalāne lage haiñ

ham ne palkoñ pe sajā rakkhā thā jin ḳhvāboñ ko

ek ik kar ke sabhī ḳhvāb Thikāne lage haiñ

jin kī shiddat se zarūrat thī zamīñ ko vo log

āsmānoñ pe zamīñ chhoḌ ke jaane lage haiñ

tanz se un kī taraf dekhtī rahtī hai ye ḳhalq

'ishq meñ saarā asāsa jo luTāne lage haiñ

dekhte dekhte kyā ho ga.ī apnī duniyā

jo hañsāte the vahī log rulāne lage haiñ

ham se ḳhush duniyā hai ghar vaale bhī ḳhush haiñ ham se

she'r bhī kahte haiñ paise bhī kamāne lage haiñ

ham se katrā ke guzar jaate the sab ahl-e-nazar

ab jidhar jaate haiñ vo bhī udhar aane lage haiñ

bādshāhī kā hai ham meñ na faqīrī kā hunar

phir bhī kyoñ log hameñ milne ko aane lage haiñ

baat be-baat pe sab shor machane lage hain

sar pe suraj hai magar dip jalane lage hain

hum ne palkon pe saja rakkha tha jin KHwabon ko

ek ek kar ke sabhi KHwab Thikane lage hain

jin ki shiddat se zarurat thi zamin ko wo log

aasmanon pe zamin chhoD ke jaane lage hain

tanz se un ki taraf dekhti rahti hai ye KHalq

'ishq mein sara asasa jo luTane lage hain

dekhte dekhte kya ho gai apni duniya

jo hansate the wahi log rulane lage hain

hum se KHush duniya hai ghar wale bhi KHush hain hum se

she'r bhi kahte hain paise bhi kamane lage hain

hum se katra ke guzar jate the sab ahl-e-nazar

ab jidhar jate hain wo bhi udhar aane lage hain

baadshahi ka hai hum mein na faqiri ka hunar

phir bhi kyon log hamein milne ko aane lage hain