baat dil ki zaban pe aai hai

baat dil kī zabāñ pe aa.ī hai

ab ye apnī nahīñ parā.ī hai

ḳhair dāġh-e-jigar kī ho yārab

umr bhar kī yahī kamā.ī hai

chup raheñ to rahā nahīñ jaatā

kuchh jo kahiye to jag-hañsā.ī hai

aql do chaar gaam tak mahdūd

ishq kī duur tak rasā.ī hai

mutabassim hue haiñ lab kis ke

kā.enāt aaj muskurā.ī hai

vo bhī hai ik maqām-e-ishq jahāñ

ham ne apnī hañsī uḌaa.ī hai

tajziya vasl kā kiyā to khulā

ye to ik mustaqil judā.ī hai

inqalāb is se baḌh ke kyā hogā

kal jo parbat thā aaj raa.ī hai

ġhair ham ko shikast de na sake

ham ne apnoñ se maat khaa.ī hai

pāk-dāman haiñ bāda-noshī se

pārsā.ī sī pārsā.ī hai

dil churāyā to hiir ḳhuub kiyā

aañkh 'tālib' se kyuuñ churā.ī hai

baat dil ki zaban pe aai hai

ab ye apni nahin parai hai

KHair dagh-e-jigar ki ho yarab

umr bhar ki yahi kamai hai

chup rahen to raha nahin jata

kuchh jo kahiye to jag-hansai hai

aql do chaar gam tak mahdud

ishq ki dur tak rasai hai

mutabassim hue hain lab kis ke

kaenat aaj muskurai hai

wo bhi hai ek maqam-e-ishq jahan

hum ne apni hansi uDai hai

tajziya wasl ka kiya to khula

ye to ek mustaqil judai hai

inqalab is se baDh ke kya hoga

kal jo parbat tha aaj rai hai

ghair hum ko shikast de na sake

hum ne apnon se mat khai hai

pak-daman hain baada-noshi se

parsai si parsai hai

dil churaya to hir KHub kiya

aankh 'talib' se kyun churai hai