baat hai aap ki ghazab ki baat

baat hai aap kī ġhazab kī baat

kaash farmāte koī Dhab kī baat

muḳhtalif hai zabān dushman-o-dost

ek hotī nahīñ hai sab kī baat

jhanjhanā uTThe sāz-e-dil sab ke

al-amāñ tere zer-e-lab kī baat

āshiyāna kahāñ kahāñ ye qafas

ab kise yaad hogī jab kī baat

dil ne āḳhir nigāh ko Tokā

be-adab kah gayā adab kī baat

dard-e-dil pūchh dard vāloñ se

jāñ-ba-lab jaane jāñ-ba-lab kī baat

mausam-e-gul pe tabsira hai abas

ġhuncha-o-gul se tum ne kab kī baat

sab ke lab par haiñ tazkire kal ke

koī kahtā nahīñ hai ab kī baat

sham.a raushan huī hai āḳhir-e-shab

sub.h ko yaad aa.ī shab kī baat

dil ko bhaa.ī bas un kī baat 'ashraf'

yuuñ to sunñe ko sun lī sab kī baat

baat hai aap ki ghazab ki baat

kash farmate koi Dhab ki baat

muKHtalif hai zaban dushman-o-dost

ek hoti nahin hai sab ki baat

jhanjhana uTThe saz-e-dil sab ke

al-aman tere zer-e-lab ki baat

aashiyana kahan kahan ye qafas

ab kise yaad hogi jab ki baat

dil ne aaKHir nigah ko Toka

be-adab kah gaya adab ki baat

dard-e-dil puchh dard walon se

jaan-ba-lab jaane jaan-ba-lab ki baat

mausam-e-gul pe tabsira hai abas

ghuncha-o-gul se tum ne kab ki baat

sab ke lab par hain tazkire kal ke

koi kahta nahin hai ab ki baat

shama raushan hui hai aaKHir-e-shab

subh ko yaad aai shab ki baat

dil ko bhai bas un ki baat 'ashraf'

yun to sunne ko sun li sab ki baat