baat jo kahne ko thi sab se zaruri rah gai

baat jo kahne ko thī sab se zarūrī rah ga.ī

kyā kiyā jaa.e ġhazal ye bhī adhūrī rah ga.ī

rizq se baḌh kar use kuchh aur bhī darkār thā

kal vo taa.ir uḌ gayā piñjre meñ chūrī rah ga.ī

thī bahut shaffāf lekin din kī uḌtī gard meñ

shaam tak ye zindagī rangat meñ bhūrī rah ga.ī

kyoñ chale aa.e khulī āñkhoñ kī vahshat kāTne

is galī meñ niiñd kyā puurī kī puurī rah ga.ī

bas yahī hāsil huā tarmīm kī tarmīm se

hāsil-o-maqsūd meñ pahlī sī duurī rah ga.ī

kis qarīne se chhupāyā bhed lekin khul gayā

ġhāliban koī ishārat lā-shu'ūrī rah ga.ī

baat jo kahne ko thi sab se zaruri rah gai

kya kiya jae ghazal ye bhi adhuri rah gai

rizq se baDh kar use kuchh aur bhi darkar tha

kal wo tair uD gaya pinjre mein churi rah gai

thi bahut shaffaf lekin din ki uDti gard mein

sham tak ye zindagi rangat mein bhuri rah gai

kyon chale aae khuli aankhon ki wahshat kaTne

is gali mein nind kya puri ki puri rah gai

bas yahi hasil hua tarmim ki tarmim se

hasil-o-maqsud mein pahli si duri rah gai

kis qarine se chhupaya bhed lekin khul gaya

ghaaliban koi ishaarat la-shu'uri rah gai