baat karne mein to jati hai mulaqat ki raat

baat karne meñ to jaatī hai mulāqāt kī raat

kyā barī baat hai rah jaao yahīñ raat kī raat

zarre afshāñ ke nahīñ kirmak-e-shab-tāb se kam

hai vo zulf-e-araq-ālūd ki barsāt kī raat

zāhid us zulf meñ phañs jaa.e to itnā pūchhūñ

kahiye kis tarah kaTī qibla-e-hājāt kī raat

shaam se sub.h talak chalte haiñ jām-e-mai-e-aish

ḳhuub hotī hai basar ahl-e-ḳharābāt kī raat

vasl chāhā shab-e-me.arāj to ye uzr kiyā

hai ye allāh o payambar kī mulāqāt kī raat

ham musāfir haiñ ye duniyā hai haqīqat meñ sarā

hai tavaqquf hameñ is jā to faqat raat kī raat

chal ke ab so raho bāteñ na banāo sāhib

vasl kī shab hai nahīñ harf-e-hikāyāt kī raat

lailatul-qadr hai vaslat kī duā maañg 'amīr'

is se behtar hai kahāñ koī munājāt kī raat

baat karne mein to jati hai mulaqat ki raat

kya bari baat hai rah jao yahin raat ki raat

zarre afshan ke nahin kirmak-e-shab-tab se kam

hai wo zulf-e-araq-alud ki barsat ki raat

zahid us zulf mein phans jae to itna puchhun

kahiye kis tarah kaTi qibla-e-hajat ki raat

sham se subh talak chalte hain jam-e-mai-e-aish

KHub hoti hai basar ahl-e-KHarabaat ki raat

wasl chaha shab-e-mearaj to ye uzr kiya

hai ye allah o payambar ki mulaqat ki raat

hum musafir hain ye duniya hai haqiqat mein sara

hai tawaqquf hamein is ja to faqat raat ki raat

chal ke ab so raho baaten na banao sahib

wasl ki shab hai nahin harf-e-hikayat ki raat

lailatul-qadr hai waslat ki dua mang 'amir'

is se behtar hai kahan koi munajat ki raat