baat ko thap chahiye achchhe bure kahan nahin

baat ko thaap chāhiye achchhe bure kahāñ nahīñ

un kī nahīñ nahīñ nahīñ un kī to haañ bhī haañ nahīñ

byaah do aañkh muuñd kar dekho karo na haañ nahīñ

is ke bhī baap maañ nahīñ us ke bhī baap maañ nahīñ

ulTī kabīr daas kī beTī samajh meñ aa.e kyā

kahte to haiñ vo haañ nahīñ kahte to haiñ vo haañ nahīñ

is ko sharīf kahte haiñ aise sharīf hote haiñ

baap ke nikle baap tum ḳhair ye hai ki maañ nahīñ

aap agar nahīñ haiñ chor maiñ bhī to phir nahīñ chhichhor

ghar meñ bulā luuñ kis tarah biibī nahīñ miyāñ nahīñ

aam kaho to vo burā imlī kaho to vo burī

pūchho to aur kaun haiñ jab ye miyāñ chiyāñ nahīñ

jhūTī ho jhuuT baktī ho jhuuT bhī vo ki sach kā baap

kaise tumhārī maan luuñ aise mire miyāñ nahīñ

apne ḳhudā se lau lagā.e sabr kiye paḌī huuñ maiñ

suunī paḌī hai jhopḌī aag nahīñ dhuāñ nahīñ

beTī kā byaah ho chukā beTe kā byaah kar chukīñ

koī kahe yahāñ nahīñ koī kahe vahāñ nahīñ

mere liye hai nand zahr un ke liye hai saas qahr

merā guzārā vaañ nahīñ un kā guzārā yaañ nahīñ

laakh meñ ek haiñ miyāñ ujḌī dul.han ḳhitāb hai

kaan meñ bāliyāñ nahīñ haath meñ chūḌiyāñ nahīñ

naushe miyāñ tumhāre to byaah ke din abhī na the

simTe hue ho sharm se muñh pe ye jhurriyāñ nahīñ

kaise batā.ūñ laḌkiyo ruuh kī tum ko asliyat

saath hai saa.e kī tarah detī par apnī chhāñ nahīñ

peT meñ daana chāhiye jeb meñ daam chāhiye

mahñgī se mahñgī chiiz bhī phir to miyāñ garāñ nahīñ

aql ke chalte ai miyāñ khāte ho muft Thokareñ

diin kī raah saaf hai khaa.ī nahīñ kuaañ nahīñ

reḳhtī hai ye reḳhtī 'shaidā' ab aur kyā kahūñ

sau kī ek ye baat hai sab meñ ye ḳhūbiyāñ nahīñ

baat ko thap chahiye achchhe bure kahan nahin

un ki nahin nahin nahin un ki to han bhi han nahin

byah do aankh mund kar dekho karo na han nahin

is ke bhi bap man nahin us ke bhi bap man nahin

ulTi kabir das ki beTi samajh mein aae kya

kahte to hain wo han nahin kahte to hain wo han nahin

is ko sharif kahte hain aise sharif hote hain

bap ke nikle bap tum KHair ye hai ki man nahin

aap agar nahin hain chor main bhi to phir nahin chhichhor

ghar mein bula lun kis tarah bibi nahin miyan nahin

aam kaho to wo bura imli kaho to wo buri

puchho to aur kaun hain jab ye miyan chiyan nahin

jhuTi ho jhuT bakti ho jhuT bhi wo ki sach ka bap

kaise tumhaari man lun aise mere miyan nahin

apne KHuda se lau lagae sabr kiye paDi hun main

suni paDi hai jhopDi aag nahin dhuan nahin

beTi ka byah ho chuka beTe ka byah kar chukin

koi kahe yahan nahin koi kahe wahan nahin

mere liye hai nand zahr un ke liye hai sas qahr

mera guzara wan nahin un ka guzara yan nahin

lakh mein ek hain miyan ujDi dulhan KHitab hai

kan mein baaliyan nahin hath mein chuDiyan nahin

naushe miyan tumhaare to byah ke din abhi na the

simTe hue ho sharm se munh pe ye jhurriyan nahin

kaise bataun laDkiyo ruh ki tum ko asliyat

sath hai sae ki tarah deti par apni chhan nahin

peT mein dana chahiye jeb mein dam chahiye

mahngi se mahngi chiz bhi phir to miyan garan nahin

aql ke chalte ai miyan khate ho muft Thokaren

din ki rah saf hai khai nahin kuan nahin

reKHti hai ye reKHti 'shaida' ab aur kya kahun

sau ki ek ye baat hai sab mein ye KHubiyan nahin