baat koi umid ki mujhse nahin kahi gai

baat koī umiid kī mujh se nahīñ kahī ga.ī

so mire ḳhvāb bhī ga.e so merī niiñd bhī ga.ī

dil kā thā ek mudda.ā jis ne tabāh kar diyā

dil meñ thī ek hī to baat vo jo faqat sahī ga.ī

jāniye kyā talāsh thī 'jaun' mire vajūd meñ

jis ko maiñ DhūñDhtā gayā jo mujhe DhūñDhtī ga.ī

ek ḳhushī kā haal hai ḳhush-suḳhanāñ ke darmiyāñ

izzat-e-shā.eqīn-e-ġham thī jo rahī-sahī ga.ī

būd-o-nabūd kī tamīz ek azaab thī ki thī

ya.anī tamām zindagī dhuñd meñ Dūbtī ga.ī

us ke jamāl kā thā din merā vajūd aur phir

sub.h se dhuup bhī ga.ī raat se chāñdnī ga.ī

jab maiñ thā shahr zaat kā thā mirā har-nafas azaab

phir maiñ vahāñ kā thā jahāñ hālat-e-zāt bhī ga.ī

gard-fashāñ huuñ dasht meñ sīna-zanāñ huuñ shahr meñ

thī jo sabā-e-samt-e-dil jaane kahāñ chalī ga.ī

tum ne bahut sharāb pī us kā sabhī ko dukh hai 'jaun'

aur jo dukh hai vo ye hai tum ko sharāb pī ga.ī

baat koi umid ki mujh se nahin kahi gai

so mere KHwab bhi gae so meri nind bhi gai

dil ka tha ek muddaa jis ne tabah kar diya

dil mein thi ek hi to baat wo jo faqat sahi gai

jaaniye kya talash thi 'jaun' mere wajud mein

jis ko main DhunDhta gaya jo mujhe DhunDhti gai

ek KHushi ka haal hai KHush-suKHanan ke darmiyan

izzat-e-shaeqin-e-gham thi jo rahi-sahi gai

bud-o-nabud ki tamiz ek azab thi ki thi

yani tamam zindagi dhund mein Dubti gai

us ke jamal ka tha din mera wajud aur phir

subh se dhup bhi gai raat se chandni gai

jab main tha shahr zat ka tha mera har-nafas azab

phir main wahan ka tha jahan haalat-e-zat bhi gai

gard-fashan hun dasht mein sina-zanan hun shahr mein

thi jo saba-e-samt-e-dil jaane kahan chali gai

tum ne bahut sharab pi us ka sabhi ko dukh hai 'jaun'

aur jo dukh hai wo ye hai tum ko sharab pi gai