بات سیدھی بھی ہو تکرار بنا لیتا ہوں

بات سیدھی بھی ہو تکرار بنا لیتا ہوں

میں محبت کو بھی اسرار بنا لیتا ہوں

پہلے پہلے تو میں اپنا تھا مگر اب خود کو

جیسی محفل ہو اداکار بنا لیتا ہوں

گھیر رکھا ہے کئی دن سے حسیں یادوں نے

ایک تصویر کئی بار بنا لیتا ہوں

دور تک کوئی مرے ساتھ نہیں چل سکتا

سو بچھڑنا بھی طرح دار بنا لیتا ہوں

میں ہواؤں پہ قناعت نہیں کرنے والا

میں تو ہاتھوں کو بھی پتوار بنا لیتا ہوں

کچھ تعلق ہے خد و خال کی صورت صابرؔ

کچھ تعلق کہ میں بے کار بنا لیتا ہوں