baat zid ki hai sawal aaina-KHane ka nahin

baat zid kī hai savāl ā.īna-ḳhāne kā nahīñ

tum bulāoge bhī mujh ko to maiñ aane kā nahīñ

qarz kī shakl meñ har saañs adā hotī hai

zindagī hai ye koī ḳhvāb divāne kā nahīñ

vaqt ke jabr se mahfūz na rah pāoge

hausla tum meñ agar zarb lagāne kā nahīñ

lūTne vaale mujhe tū bhī pashemāñ hogā

ghar kā taḳhmīna hai naqsha ye ḳhazāne kā nahīñ

vaqt māshūq nahīñ hai ki manā loge ise

ruuTh jā.egā to phir lauT ke aane kā nahīñ

ghar pe aa.e hue mehmān se muñh pherte ho

ye tarīqa to sharīfoñ ke gharāne kā nahīñ

in havāoñ kī iāñat bhī zarūrī hai 'shakīl'

mas.ala sirf charāġhoñ ko jalāne kā nahīñ

baat zid ki hai sawal aaina-KHane ka nahin

tum bulaoge bhi mujh ko to main aane ka nahin

qarz ki shakl mein har sans ada hoti hai

zindagi hai ye koi KHwab diwane ka nahin

waqt ke jabr se mahfuz na rah paoge

hausla tum mein agar zarb lagane ka nahin

luTne wale mujhe tu bhi pasheman hoga

ghar ka taKHmina hai naqsha ye KHazane ka nahin

waqt mashuq nahin hai ki mana loge ise

ruTh jaega to phir lauT ke aane ka nahin

ghar pe aae hue mehman se munh pherte ho

ye tariqa to sharifon ke gharane ka nahin

in hawaon ki ianat bhi zaruri hai 'shakil'

masala sirf charaghon ko jalane ka nahin