baaton se teri baat ki KHushbu nikal paDe

bātoñ se terī baat kī ḳhushbū nikal paḌe

pahchān kā kahīñ koī pahlū nikal paḌe

kam-kam kahūñ maiñ sher sunā.ūñ bahut hī kam

kyā jo kisī ġhazal se kabhī tū nikal paḌe

bosa kahā thā aap ne abrū chaḌhā liye

itnī zarā sī baat pe chāqū nikal paḌe

is baar us ne aap se tum kah diyā hameñ

aisī ḳhushī ki aañkh se aañsū nikal paḌe

kahte haiñ raushnī kī hifāzat kareñge ham

sūraj kī dekh-bhāl ko jugnū nikal paḌe

kānoñ meñ ras thī gholtī santoñ kī bāniyāñ

tirshūl le ke aaj ke sādhū nikal paḌe

iflās ke libās meñ ye baat hai agar

shāhāna ān-bān se urdu nikal paḌe

jab diin kī madad ko pukārā gayā 'hafīz'

phāñkā na apne haath kā sattū nikal paḌe

baaton se teri baat ki KHushbu nikal paDe

pahchan ka kahin koi pahlu nikal paDe

kam-kam kahun main sher sunaun bahut hi kam

kya jo kisi ghazal se kabhi tu nikal paDe

bosa kaha tha aap ne abru chaDha liye

itni zara si baat pe chaqu nikal paDe

is bar us ne aap se tum kah diya hamein

aisi KHushi ki aankh se aansu nikal paDe

kahte hain raushni ki hifazat karenge hum

suraj ki dekh-bhaal ko jugnu nikal paDe

kanon mein ras thi gholti santon ki baniyan

tirshul le ke aaj ke sadhu nikal paDe

iflas ke libas mein ye baat hai agar

shahana aan-ban se urdu nikal paDe

jab din ki madad ko pukara gaya 'hafiz'

phanka na apne hath ka sattu nikal paDe