baz aa baad-e-bahaaran ye shararat kya hai

baaz aa bād-e-bahārāñ ye sharārat kyā hai

dekh to nargis-e-bīmār kī hālat kyā hai

us ne bhī ‘aks-e-ruḳh-e-yār kī jur.at kī thī

dekhiye hālat-e-ā.īna-e-hairat kyā hai

tujh ko vā'iz mirī dozaḳh kā koī 'ilm nahīñ

mujh ko mā'lūm hai lekin tirī jannat kyā hai

tū mire pesh-e-nazar ho jo tasavvur meñ to bas

merī nazroñ meñ zamāne kī haqīqat kyā hai

aaj vo mā.il-e-sad-lutf-o-karam haiñ 'betāb'

kaash maiñ jāntā ki vaj.h-e-'ināyat kyā hai

baz aa baad-e-bahaaran ye shararat kya hai

dekh to nargis-e-bimar ki haalat kya hai

us ne bhi ‘aks-e-ruKH-e-yar ki jurat ki thi

dekhiye haalat-e-aina-e-hairat kya hai

tujh ko wa'iz meri dozaKH ka koi 'ilm nahin

mujh ko ma'lum hai lekin teri jannat kya hai

tu mere pesh-e-nazar ho jo tasawwur mein to bas

meri nazron mein zamane ki haqiqat kya hai

aaj wo mail-e-sad-lutf-o-karam hain 'betab'

kash main jaanta ki wajh-e-'inayat kya hai