bazar-e-mohabbat mein sharminda sharafat hai

bāzār-e-mohabbat meñ sharminda sharāfat hai

phūloñ kī numā.ish hai ḳhushbū kī tijārat hai

hañste hue gulshan ko pal bhar meñ rulā Daale

āvāra havāoñ meñ aisī bhī mahārat hai

ta.amīr kā jazba bhī taḳhrīb kā naqsha bhī

ye shauq-e-shahādat hai yā zauq-e-baġhāvat hai

bujhte hue añgāre paiġhām ye dete haiñ

sho.aloñ se ulajhne kī shabnam meñ jasārat hai

auqāt kī had se vo aage nahīñ baḌh saktā

qismat kī hathelī par raushan ye ibārat hai

ash.ār 'asar' mere mansūb usī se haiñ

jis fikr-e-rasā kī bhī añgḌā.ī qayāmat hai

bazar-e-mohabbat mein sharminda sharafat hai

phulon ki numaish hai KHushbu ki tijarat hai

hanste hue gulshan ko pal bhar mein rula Dale

aawara hawaon mein aisi bhi mahaarat hai

tamir ka jazba bhi taKHrib ka naqsha bhi

ye shauq-e-shahadat hai ya zauq-e-baghawat hai

bujhte hue angare paigham ye dete hain

shoalon se ulajhne ki shabnam mein jasarat hai

auqat ki had se wo aage nahin baDh sakta

qismat ki hatheli par raushan ye ibarat hai

ashaar 'asar' mere mansub usi se hain

jis fikr-e-rasa ki bhi angDai qayamat hai