بازاروں میں اپنا پن کم ملتا ہے

بازاروں میں اپنا پن کم ملتا ہے

تن ملتے ہیں من سے من کم ملتا ہے

کاغذ کے پھولوں میں مصنوعی خوشبو

مٹی میں بھی سوندھا پن کم ملتا ہے

ہاتھ ملانے والے اکثر ملتے ہیں

پل دو پل بھی مگدھ نین کم ملتا ہے

تلسی کا بروا ہو گنگا کا جل ہو

مندر جیسا گھر آنگن کم ملتا ہے

جیون میں ناٹک تو چلتے رہتے ہیں

ناٹک کو لیکن جیون کم ملتا ہے

درشن کی باتیں تو سب کر لیتے ہیں

بچوں جیسا بھولا پن کم ملتا ہے

شبدوں کا سوندریہ اسیمت ہو جس میں

رچنا کو ایسا چنتن کم ملتا ہے