bach nikalna kya iKHtiyar mein hai

bach nikalnā kyā iḳhtiyār meñ hai

zindagī maut ke hisār meñ hai

aarzū aur mere dil kī bisāt

ek sho.ala sā reg-zār meñ hai

kitne sūraj nigal ga.ī zulmat

aas kā diip kis shumār meñ hai

jo ḳhizāñ meñ bhī mil nahīñ saktī

vo udāsī bharī bahār meñ hai

nafrateñ ko bhī jis se nafrat ho

aisī nafrat tumhāre pyaar meñ hai

be-qarārī meñ thā qarār magar

aaj to bekalī qarār meñ hai

hausloñ kī nigāh se dekho

kāmrānī kā raaz haar meñ hai

vo bhī tum ne diyā nahīñ ham ko

jo tumhāre hī iḳhtiyār meñ hai

nā-murādī kī had hai ye 'arshad'

jiit bhī apnī aaj haar meñ hai

bach nikalna kya iKHtiyar mein hai

zindagi maut ke hisar mein hai

aarzu aur mere dil ki bisat

ek shoala sa reg-zar mein hai

kitne suraj nigal gai zulmat

aas ka dip kis shumar mein hai

jo KHizan mein bhi mil nahin sakti

wo udasi bhari bahaar mein hai

nafraten ko bhi jis se nafrat ho

aisi nafrat tumhaare pyar mein hai

be-qarari mein tha qarar magar

aaj to bekali qarar mein hai

hauslon ki nigah se dekho

kaamrani ka raaz haar mein hai

wo bhi tum ne diya nahin hum ko

jo tumhaare hi iKHtiyar mein hai

na-muradi ki had hai ye 'arshad'

jit bhi apni aaj haar mein hai