bacha gar naz se to usko phir andaz se mara

bachā gar naaz se to us ko phir andāz se maarā

koī andāz se maarā to koī naaz se maarā

kisī ko garmi-e-taqrīr se apnī lagā rakkhā

kisī ko muñh chhupā kar narmī-e-āvāz se maarā

hamārā murġh-e-dil chhoḌā na āḳhir us shikārī ne

gahe shāhīn pheñke us pe gaahe baaz se maarā

ġhazal paḌhte hī merī ye muġhannī kī huī hālat

ki us ne saaz maarā sar se aur sar saaz se maarā

nikālī rasm-e-teġh-o-tasht dilī meñ jazāk-allāh

ki maarā to hameñ tū ne par ik e.azāz se maarā

na uḌtā murġh-e-dil to changul-e-shāhīñ meñ kyuuñ phañstā

gayā ye ḳhasta apnī ḳhūbī-e-parvāz se maarā

jahāñ tak sāz-dārī hai likhī dushman ke taal.e meñ

hameñ badnām kar ke tāl.e-e-nā-sāz se maarā

hazāroñ rañg us ke ḳhuun ne yāroñ ko dikhlā.e

jab us ne 'mus.hafī' ko apnī teġh-e-nāz se maarā

bacha gar naz se to us ko phir andaz se mara

koi andaz se mara to koi naz se mara

kisi ko garmi-e-taqrir se apni laga rakkha

kisi ko munh chhupa kar narmi-e-awaz se mara

hamara murgh-e-dil chhoDa na aaKHir us shikari ne

gahe shahin phenke us pe gahe baz se mara

ghazal paDhte hi meri ye mughanni ki hui haalat

ki us ne saz mara sar se aur sar saz se mara

nikali rasm-e-tegh-o-tasht dili mein jazak-allah

ki mara to hamein tu ne par ek eazaz se mara

na uDta murgh-e-dil to changul-e-shahin mein kyun phansta

gaya ye KHasta apni KHubi-e-parwaz se mara

jahan tak saz-dari hai likhi dushman ke tale mein

hamein badnam kar ke tale-e-na-saz se mara

hazaron rang us ke KHun ne yaron ko dikhlae

jab us ne 'mushafi' ko apni tegh-e-naz se mara