bachcha bana hua hai baghawat ke baad bhi

bachcha banā huā hai baġhāvat ke ba.ad bhī

nādim nahīñ hai koī sharārat ke ba.ad bhī

taanā barastī aag meñ kāġhaz kā sā.ebāñ

jal bujh ga.e haiñ log hifāzat ke ba.ad bhī

manzil pe jā ke paañv ke chhāle ubal paḌe

ham ko sukūñ milā na masāfat ke ba.ad bhī

sūraj kī raushnī bhī na dil meñ utar sakī

ThanDak rahī badan meñ tamāzat ke ba.ad bhī

hote hī shaam yūrish-e-ḳhalvat ne aa liyā

masrūf ho gayā maiñ farāġhat ke ba.ad bhī

jo kuchh kahā gayā use maane nahīñ haiñ ham

bāġhī rahā hai zehn hirāsat ke ba.ad bhī

ab phir usī ke naam pe bekal huā hai 'jān'

dil meñ vahī taḌap hai adāvat ke ba.ad bhī

bachcha bana hua hai baghawat ke baad bhi

nadim nahin hai koi shararat ke baad bhi

tana barasti aag mein kaghaz ka saeban

jal bujh gae hain log hifazat ke baad bhi

manzil pe ja ke panw ke chhaale ubal paDe

hum ko sukun mila na masafat ke baad bhi

suraj ki raushni bhi na dil mein utar saki

ThanDak rahi badan mein tamazat ke baad bhi

hote hi sham yurish-e-KHalwat ne aa liya

masruf ho gaya main faraghat ke baad bhi

jo kuchh kaha gaya use mane nahin hain hum

baghi raha hai zehn hirasat ke baad bhi

ab phir usi ke nam pe bekal hua hai 'jaan'

dil mein wahi taDap hai adawat ke baad bhi