bache hue the jo patte yahan KHizaon se

bache hue the jo patte yahāñ ḳhizāoñ se

bikhar ga.e haiñ vahī narm-rau havāoñ se

tapī muñDer pe baiThā huā parinda hai

Darā huā hai vo shāyad shajar kī chhāñv se

rutoñ ne dekh liyā hai chalan zamīnoñ kā

baras rahī hai tamāzat yahāñ ghaTāoñ se

fazā-e-shab se koī āftāb guzrā hai

sukūt guuñj rahā hai abhī sadāoñ se

ajiib ruup meñ dekhā use zamāne ne

vo saada laḌkī kabhī aa.ī thī jo gaañv se

dayār-e-ġhair meñ yādeñ qadam qadam par thiiñ

judā huī na safar meñ zamīn paañv se

vo kaisā ḳhvāb thā kal shab 'aqīl' āñkhoñ meñ

vajūd guuñj rahā hai mirā nidāoñ se

bache hue the jo patte yahan KHizaon se

bikhar gae hain wahi narm-rau hawaon se

tapi munDer pe baiTha hua parinda hai

Dara hua hai wo shayad shajar ki chhanw se

ruton ne dekh liya hai chalan zaminon ka

baras rahi hai tamazat yahan ghaTaon se

faza-e-shab se koi aaftab guzra hai

sukut gunj raha hai abhi sadaon se

ajib rup mein dekha use zamane ne

wo sada laDki kabhi aai thi jo ganw se

dayar-e-ghair mein yaaden qadam qadam par thin

juda hui na safar mein zamin panw se

wo kaisa KHwab tha kal shab 'aqil' aankhon mein

wajud gunj raha hai mera nidaon se