bachpan ke zaKHm ko kahin marham nahin mila

bachpan ke zaḳhm ko kahīñ marham nahīñ milā

us par mirī javānī ko ġham kam nahīñ milā

sahrā meñ har kisī se nahīñ hote mo'jize

vo vādiyāñ bhī haiñ jinheñ zamzam nahīñ milā

nusrat kā shauq thā ki ye baazū kaTā diye

lekin hamāre haath ko parcham nahīñ milā

mahrūmiyoñ kā merī bhalā kyā hisāb ho

mujh ko to marne vaale kā mātam nahīñ milā

tanhā.iyoñ kī maarī huī maiñ idhar udhar

tasvīr huuñ jise koī album nahīñ milā

har baar saf se aage nikal aa.e ham magar

ham ko kisī bhī jang meñ parcham nahīñ milā

duniyā kī bhiiḌ meñ hue rusvā jahāñ ga.e

'jānī' nahīñ milā koī hamdam nahīñ milā

bachpan ke zaKHm ko kahin marham nahin mila

us par meri jawani ko gham kam nahin mila

sahra mein har kisi se nahin hote mo'jize

wo wadiyan bhi hain jinhen zamzam nahin mila

nusrat ka shauq tha ki ye bazu kaTa diye

lekin hamare hath ko parcham nahin mila

mahrumiyon ka meri bhala kya hisab ho

mujh ko to marne wale ka matam nahin mila

tanhaiyon ki mari hui main idhar udhar

taswir hun jise koi album nahin mila

har bar saf se aage nikal aae hum magar

hum ko kisi bhi jang mein parcham nahin mila

duniya ki bhiD mein hue ruswa jahan gae

'jaani' nahin mila koi hamdam nahin mila