bachpan ki yaadon ko bhulae ek zamana bit gaya

bachpan kī yādoñ ko bhulā.e ek zamāna biit gayā

ham ko des se bāhar aa.e ek zamāna biit gayā

galiyoñ aur bāzāroñ meñ maiñ maarā maarā phirtā huuñ

ḳhushiyoñ kī ik bazm sajā.e ek zamāna biit gayā

merī taraf bhī chashm-e-karam ahbāb kabhī farmā.eñge

un se ye ummīd lagā.e ek zamāna biit gayā

kis ko ḳhabar kab puurī hogī ḳhvāboñ kī ta.abīr mire

nīñdoñ ko palkoñ pe sajā.e ek zamāna biit gayā

is duniyā meñ apne parā.e kī hai 'sahar' pahchān kise

mahfil-e-jāñ meñ mujh ko aa.e ek zamāna biit gayā

bachpan ki yaadon ko bhulae ek zamana bit gaya

hum ko des se bahar aae ek zamana bit gaya

galiyon aur bazaron mein main mara mara phirta hun

KHushiyon ki ek bazm sajae ek zamana bit gaya

meri taraf bhi chashm-e-karam ahbab kabhi farmaenge

un se ye ummid lagae ek zamana bit gaya

kis ko KHabar kab puri hogi KHwabon ki tabir mere

nindon ko palkon pe sajae ek zamana bit gaya

is duniya mein apne parae ki hai 'sahar' pahchan kise

mahfil-e-jaan mein mujh ko aae ek zamana bit gaya