بد دعا تیری مرے حق میں دعا ہو جانا

بد دعا تیری مرے حق میں دعا ہو جانا

ہے کرامت تجھے احساس وفا ہو جانا

ہے یقیناً مری فریاد و فغاں کی تاثیر

عندلیبوں کا یہاں شعلہ نوا ہو جانا

رکھے جس حال میں تو شکر خدا کر بندے

ہے مناسب تجھے راضی بہ رضا ہو جانا

میرے نزدیک نہیں بڑھ کے عبادت اس سے

فرض انساں پہ جو لازم ہے ادا ہو جانا

حسن اخلاق سے انسان کا ہونا عاری

جیسے اک پھول سے خوشبو کا جدا ہو جانا

شدت غم سے ہوا ہم پہ یہ واضح جگدیشؔ

درد کا حد سے گزرنا ہے دوا ہو جانا