bad-guman kya qabr mein arman tere le jaenge

bad-gumāñ kyā qabr meñ armāñ tire le jā.eñge

ham akele aa.e haiñ jaise akele jā.eñge

kis qadar sābit qadam haiñ rah-ravān-e-dost

jā.eñge phir un kī koī jaan le le jā.eñge

hazrat-e-dil aur phir jaa.eñ na us kī bazm meñ

jhiḌkiyāñ de le koī ilzām de le jā.eñge

tum satā lo mujh ko lekin yuuñ na har ik se milo

zulm sah lūñgā magar sadme na jhele jā.eñge

is galī meñ Daal do tā sambhleñ Thokar khā ke ġhair

yuuñ bhī ik din ḳhaak meñ āñkhoñ ke Dhele jā.eñge

hai duāoñ kā asar sañg-e-havādis hī agar

apne hāthoñ phir to ye sadme na jhele jā.eñge

ḳhair ḳhvāhoñ rāz-dāroñ kī bahut niyyat dekh lī

aaj se ham us kī mahfil meñ akele jā.eñge

be-kasī meñ kaun kis kā saath detā hai safī'

milne vaale haiñ tamāshe ke ye mele jā.eñge

bad-guman kya qabr mein arman tere le jaenge

hum akele aae hain jaise akele jaenge

kis qadar sabit qadam hain rah-rawan-e-dost

jaenge phir un ki koi jaan le le jaenge

hazrat-e-dil aur phir jaen na us ki bazm mein

jhiDkiyan de le koi ilzam de le jaenge

tum sata lo mujh ko lekin yun na har ek se milo

zulm sah lunga magar sadme na jhele jaenge

is gali mein Dal do ta sambhlen Thokar kha ke ghair

yun bhi ek din KHak mein aankhon ke Dhele jaenge

hai duaon ka asar sang-e-hawadis hi agar

apne hathon phir to ye sadme na jhele jaenge

KHair KHwahon raaz-daron ki bahut niyyat dekh li

aaj se hum us ki mahfil mein akele jaenge

be-kasi mein kaun kis ka sath deta hai safi'

milne wale hain tamashe ke ye mele jaenge