bad-guman mujhse na ai fasl-e-bahaaran hona

bad-gumāñ mujh se na ai fasl-e-bahārāñ honā

merī aadat hai ḳhizāñ meñ bhī gul-afshāñ honā

mere ġham ko bhī dil-āvez banā detā hai

terī āñkhoñ se mire ġham kā numāyāñ honā

kyuuñ na pyaar aa.e use apnī pareshānī par

siikh le jo tirī zulfoñ se pareshāñ honā

mere vijdān ne mahsūs kiyā hai aksar

terī ḳhāmosh nigāhoñ kā ġhazal-ḳhvāñ honā

ye to mumkin hai kisī roz ḳhudā ban jaa.e

ġhair mumkin hai magar shaiḳh kā insāñ honā

apnī vahshat kī numā.ish mujhe manzūr na thī

varna dushvār na thā chāk-girebāñ honā

rahrav-e-shauq ko gumrāh bhī kar detā hai

baaz auqāt kisī raah kā āsāñ honā

kyuuñ gurezāñ ho mirī jaan pareshānī se

dūsrā naam hai jiine kā pareshāñ honā

jin ko hamdard samajhte ho hañseñge tum par

hāl-e-dil kah ke na ai 'shād' pashīmāñ honā

bad-guman mujh se na ai fasl-e-bahaaran hona

meri aadat hai KHizan mein bhi gul-afshan hona

mere gham ko bhi dil-awez bana deta hai

teri aankhon se mere gham ka numayan hona

kyun na pyar aae use apni pareshani par

sikh le jo teri zulfon se pareshan hona

mere wijdan ne mahsus kiya hai aksar

teri KHamosh nigahon ka ghazal-KHwan hona

ye to mumkin hai kisi roz KHuda ban jae

ghair mumkin hai magar shaiKH ka insan hona

apni wahshat ki numaish mujhe manzur na thi

warna dushwar na tha chaak-gireban hona

rahraw-e-shauq ko gumrah bhi kar deta hai

baz auqat kisi rah ka aasan hona

kyun gurezan ho meri jaan pareshani se

dusra nam hai jine ka pareshan hona

jin ko hamdard samajhte ho hansenge tum par

haal-e-dil kah ke na ai 'shad' pashiman hona