bad-gumani ki sada kai jami rahti hai

bad-gumānī kī sadā kaa.ī jamī rahtī hai

is qadar chashm-e-gurezāñ meñ namī rahtī hai

tum to is ghar se ga.e raunaqeñ ghar kī le kar

ab to vīrānī sī is ghar meñ paḌī rahtī hai

mujh ko lā.eñgī kināre pe ye lahreñ ik din

jin se kashtī mirī har-vaqt ghirī rahtī hai

hai ye e.ajāz-e-karam terī masīhā.ī kā

shāḳh gulhā-e-aqīdat kī harī rahtī hai

kis tarah dekhūñ tujhe madd-e-muqābil mere

hairatoñ kī koī dīvār khaḌī rahtī hai

kaun rahtā hai yahāñ koī nahīñ rahtā hai

ab to is dil meñ faqat terī kamī rahtī hai

khol detā huuñ sabhī yaad ke tasme lekin

ek ummīd sadā dil se bañdhī rahtī hai

kaise mumkin hai kisī aur kī ḳhushbū aa.e

terī ḳhushbū mirī sāñsoñ meñ basī rahtī hai

apne qadmoñ meñ simaT jaate haiñ saa.e 'ash.har'

dhuup mahrūmī kī jab sar pe kaḌī rahtī hai

bad-gumani ki sada kai jami rahti hai

is qadar chashm-e-gurezan mein nami rahti hai

tum to is ghar se gae raunaqen ghar ki le kar

ab to virani si is ghar mein paDi rahti hai

mujh ko laengi kinare pe ye lahren ek din

jin se kashti meri har-waqt ghiri rahti hai

hai ye eajaz-e-karam teri masihai ka

shaKH gulha-e-aqidat ki hari rahti hai

kis tarah dekhun tujhe madd-e-muqabil mere

hairaton ki koi diwar khaDi rahti hai

kaun rahta hai yahan koi nahin rahta hai

ab to is dil mein faqat teri kami rahti hai

khol deta hun sabhi yaad ke tasme lekin

ek ummid sada dil se bandhi rahti hai

kaise mumkin hai kisi aur ki KHushbu aae

teri KHushbu meri sanson mein basi rahti hai

apne qadmon mein simaT jate hain sae 'ashhar'

dhup mahrumi ki jab sar pe kaDi rahti hai