baDa hi talKH lahja hai zaban par

baḌā hī talḳh lahja hai zabāñ par

liye ho bojh kaisā jism-o-jāñ par

nishāñ dīvār-e-dil kā kah rahā hai

koī tasvīr thī pahle yahāñ par

jahāñ vo dikh rahe hote haiñ phir to

koī dikhtā nahīñ ham ko vahāñ par

mirī qīmat mujhe bhī jānnī thī

so maiñ ne rakh diyā ḳhud ko dukāñ par

jahāñ kā har musāfir rāhbar ho

taras aatā hai aise kārvāñ par

mirā dār-o-madār-e-zindagī bhī

Tikā hai bas tumhārī ek haañ par

na jaane kaun sā ghar ho tumhārā

so dastak de rahā huuñ har makāñ par

use hairān karnā thā so maiñ ne

zamīñ le jā ke rakh dī āsmāñ par

baDa hi talKH lahja hai zaban par

liye ho bojh kaisa jism-o-jaan par

nishan diwar-e-dil ka kah raha hai

koi taswir thi pahle yahan par

jahan wo dikh rahe hote hain phir to

koi dikhta nahin hum ko wahan par

meri qimat mujhe bhi jaanni thi

so main ne rakh diya KHud ko dukan par

jahan ka har musafir rahbar ho

taras aata hai aise karwan par

mera dar-o-madar-e-zindagi bhi

Tika hai bas tumhaari ek han par

na jaane kaun sa ghar ho tumhaara

so dastak de raha hun har makan par

use hairan karna tha so main ne

zamin le ja ke rakh di aasman par