baDa muKHlis hun paband-e-wafa hun

baḌā muḳhlis huuñ pāband-e-vafā huuñ

kisī kī sādgī par ro paḌā huuñ

mirī qīmat zamīn-o-āsmāñ hai

bahut anmol huuñ phir bhī bikā huuñ

chhalaktā jaam huuñ phir bhī huuñ pyāsā

maiñ apne aap meñ ik karbalā huuñ

na jaane guftugū kyā gul khilā.e

tumhārī ḳhāmushī se jal gayā huuñ

kitāb-e-dil ko dīmak lag ga.ī hai

tumhārā naam kyā hai DhūñDhtā huuñ

hazāroñ daaġh haiñ mere badan par

na jaane kis ke dil kā rāsta huuñ

'kamāl' is qatl-gāh-e-raushnī meñ

hazāroñ baar maiñ bujh kar jalā huuñ

baDa muKHlis hun paband-e-wafa hun

kisi ki sadgi par ro paDa hun

meri qimat zamin-o-asman hai

bahut anmol hun phir bhi bika hun

chhalakta jam hun phir bhi hun pyasa

main apne aap mein ek karbala hun

na jaane guftugu kya gul khilae

tumhaari KHamushi se jal gaya hun

kitab-e-dil ko dimak lag gai hai

tumhaara nam kya hai DhunDhta hun

hazaron dagh hain mere badan par

na jaane kis ke dil ka rasta hun

'kamal' is qatl-gah-e-raushni mein

hazaron bar main bujh kar jala hun