badal chuki hai har ek yaad apni surat bhi

badal chukī hai har ik yaad apnī sūrat bhī

vo ahd-e-rafta kā har ḳhvāb har haqīqat bhī

kuchh un ke kaam nikalte haiñ dushmanī meñ mirī

maiñ dushmanoñ kī hamesha se huuñ zarūrat bhī

kisī bhī lafz ne thāmā nahīñ hai haath mirā

maiñ paḌh ke dekh chukī āḳhirī ibārat bhī

ye jis ne rok liyā mujh ko aage baḌhne se

vo merī be-ġharazī thī mirī zarūrat bhī

mirī shikasta-dilī hī ba-rū-e-kār aa.ī

vagarna vaqt to kartā nahīñ ri.āyat bhī

maiñ apnī baat kisī se bhī kar na pā.ūñgī

mujhe tabāh karegī ye merī aadat bhī

maiñ kaise baat bhalā dil kī maan luuñ 'shabnam'

ki us ko mujh se mohabbat bhī thī adāvat bhī

ye merā ijz ki dil meñ use utarne diyā

ye us kā maan ki māñgī nahīñ ijāzat bhī

badal chuki hai har ek yaad apni surat bhi

wo ahd-e-rafta ka har KHwab har haqiqat bhi

kuchh un ke kaam nikalte hain dushmani mein meri

main dushmanon ki hamesha se hun zarurat bhi

kisi bhi lafz ne thama nahin hai hath mera

main paDh ke dekh chuki aaKHiri ibarat bhi

ye jis ne rok liya mujh ko aage baDhne se

wo meri be-gharazi thi meri zarurat bhi

meri shikasta-dili hi ba-ru-e-kar aai

wagarna waqt to karta nahin riayat bhi

main apni baat kisi se bhi kar na paungi

mujhe tabah karegi ye meri aadat bhi

main kaise baat bhala dil ki man lun 'shabnam'

ki us ko mujh se mohabbat bhi thi adawat bhi

ye mera ijz ki dil mein use utarne diya

ye us ka man ki mangi nahin ijazat bhi