badal ke rakh denge ye tasawwur ki aadmi ka waqar kya hai

badal ke rakh deñge ye tasavvur ki aadmī kā vaqār kyā hai

ḳhalā meñ vo chāñd nāchtā hai zamāñ makāñ kā hisār kyā hai

bahak ga.e the sambhal ga.e haiñ sitam kī had se nikal ga.e haiñ

ham ahl-e-dil ye samajh ga.e haiñ kashākash-e-rozgār kyā hai

abhī na pūchho ki lāla-zāroñ se uTh rahā hai dhuāñ vo kaisā

magar ye dekho ki phuul banñe kā ārzū-mand ḳhaar kyā hai

vahī bane dushman-e-tamannā jinheñ sikhāyā thā ham ne jiinā

agar ye pūchheñ to kis se pūchheñ ki dostī kā shi.ār kyā hai

kabhī hai shabnam kabhī sharārā falak se TuuTā to ek taarā

ġham-e-mohabbat ke rāzdāro ye gauhar-e-ābdār kyā hai

bahār kī tum na.ī kalī ho abhī abhī jhuum kar khilī ho

magar kabhī ham se yūñhī pūchho ki hasratoñ kā mazār kyā hai

ba-īñ tabāhī dikhā.e ham ne vo mo.ajize āshiqī ke tum ko

ba-īñ adāvat kabhī na kahnā ki aap sā ḳhāksār kyā hai

bane koī ilm o fan kā mālik ki maiñ huuñ rāh-e-vafā kā sālik

nahīñ hai shohrat kī fikr 'bāqar' ġhazal kā ik rāzdār kyā hai

badal ke rakh denge ye tasawwur ki aadmi ka waqar kya hai

KHala mein wo chand nachta hai zaman makan ka hisar kya hai

bahak gae the sambhal gae hain sitam ki had se nikal gae hain

hum ahl-e-dil ye samajh gae hain kashakash-e-rozgar kya hai

abhi na puchho ki lala-zaron se uTh raha hai dhuan wo kaisa

magar ye dekho ki phul banne ka aarzu-mand KHar kya hai

wahi bane dushman-e-tamanna jinhen sikhaya tha hum ne jina

agar ye puchhen to kis se puchhen ki dosti ka shiar kya hai

kabhi hai shabnam kabhi sharara falak se TuTa to ek tara

gham-e-mohabbat ke raazdaro ye gauhar-e-abdar kya hai

bahaar ki tum nai kali ho abhi abhi jhum kar khili ho

magar kabhi hum se yunhi puchho ki hasraton ka mazar kya hai

ba-in tabahi dikhae hum ne wo moajize aashiqi ke tum ko

ba-in adawat kabhi na kahna ki aap sa KHaksar kya hai

bane koi ilm o fan ka malik ki main hun rah-e-wafa ka salik

nahin hai shohrat ki fikr 'baqar' ghazal ka ek raazdar kya hai