badalne wali hai faza ai dil kuchh aur der ruk

badalne vaalī hai fazā ai dil kuchh aur der ruk

hai shab kā āḳhirī pahar añdhere hoñge zer ruk

jahān-e-dil pe raushnī bikherne ke vāste

vo māhtāb aa.egā abhī nazar na pher ruk

abhī abhī huā hai ishq abhī se kyoñ hai muztarib

lagegā terī zindagī meñ bhī ġhamoñ kā Dher ruk

bahut dinoñ ke ba.ad aa.e haiñ vo ḳhvāb meñ unheñ

maiñ aañkh bhar ke dekh luuñ ai ḳhvāb thoḌī der ruk

nabāt-o-naḳhl par girāñ guzartā hai ye mashġhala

daraḳht ke tane pe yuuñ hurūf mat uker ruk

nahīñ hai kaam buz-diloñ kā ishq ke mahāz par

yahāñ sabhī diler haiñ jo tū bhī hai diler ruk

milegī dād-e-fan kujā jaleñge tujh se ham-suḳhan

har ek bazm meñ hunar ke jalve mat bikher ruk

dil-e-ġharīb ko ai 'shād' ḳhvāhishoñ ke jaal meñ

qasam hai tujh ko yuuñ na be-muravvatī se gher ruk

badalne wali hai faza ai dil kuchh aur der ruk

hai shab ka aaKHiri pahar andhere honge zer ruk

jahan-e-dil pe raushni bikherne ke waste

wo mahtab aaega abhi nazar na pher ruk

abhi abhi hua hai ishq abhi se kyon hai muztarib

lagega teri zindagi mein bhi ghamon ka Dher ruk

bahut dinon ke baad aae hain wo KHwab mein unhen

main aankh bhar ke dekh lun ai KHwab thoDi der ruk

nabaat-o-naKHl par giran guzarta hai ye mashghala

daraKHt ke tane pe yun huruf mat uker ruk

nahin hai kaam buz-dilon ka ishq ke mahaz par

yahan sabhi diler hain jo tu bhi hai diler ruk

milegi dad-e-fan kuja jalenge tujh se ham-suKHan

har ek bazm mein hunar ke jalwe mat bikher ruk

dil-e-gharib ko ai 'shad' KHwahishon ke jal mein

qasam hai tujh ko yun na be-murawwati se gher ruk