badalte mausamon mein aab-o-dana bhi nahin hoga

badalte mausamoñ meñ āb-o-dāna bhī nahīñ hogā

ki peḌoñ par parindoñ kā Thikāna bhī nahīñ hogā

bahā le jā.eñgī maujeñ kitāb-e-zindagānī ko

sunāne ke liye koī fasāna bhī nahīñ hogā

navāh-e-jāñ meñ ik din tum utar kar dekh bhī lenā

tumhāre paas yādoñ kā ḳhazāna bhī nahīñ hogā

tasavvur kī hadoñ se duur jā kar kaise dekheñge

agar tum se ta.alluq ġhā.ebāna bhī nahīñ hogā

khulā dar chhoḌ aa.e the ki hijrat kā taqāza thā

vahāñ kyā lauT kar jaa.eñ Thikāna bhī nahīñ hogā

badalte mausamon mein aab-o-dana bhi nahin hoga

ki peDon par parindon ka Thikana bhi nahin hoga

baha le jaengi maujen kitab-e-zindagani ko

sunane ke liye koi fasana bhi nahin hoga

nawah-e-jaan mein ek din tum utar kar dekh bhi lena

tumhaare pas yaadon ka KHazana bhi nahin hoga

tasawwur ki hadon se dur ja kar kaise dekhenge

agar tum se talluq ghaebana bhi nahin hoga

khula dar chhoD aae the ki hijrat ka taqaza tha

wahan kya lauT kar jaen Thikana bhi nahin hoga