badalte waqt ki raftar kya hai

badalte vaqt kī raftār kyā hai

mohabbat ab tirā kirdār kyā hai

zamīñ ko chhū rahā hai āsmāñ ab

talab kī raah meñ paikār kyā hai

kaTā kar sar bhī martā hī nahīñ vaqt

havā ke haath meñ talvār kyā hai

bhulā baiThā huuñ maiñ ḳhud ko bhī logo

mire kāñdhoñ pe ab ye baar kyā hai

azal se hai mirī fitrat meñ jhuknā

to phir sajdoñ se mujh ko aar kyā hai

anal-haq se abhī vāqif nahīñ maiñ

mujhe ma.alūm kab hai daar kyā hai

mujhe hai faḳhr maiñ ḳhākī huuñ merī

nazar meñ nuur kyā hai taar kyā hai

sabā se pūchhtā phirtā huuñ 'aiman'

vafā meñ phuul kyā hai ḳhaar kyā hai

badalte waqt ki raftar kya hai

mohabbat ab tera kirdar kya hai

zamin ko chhu raha hai aasman ab

talab ki rah mein paikar kya hai

kaTa kar sar bhi marta hi nahin waqt

hawa ke hath mein talwar kya hai

bhula baiTha hun main KHud ko bhi logo

mere kandhon pe ab ye bar kya hai

azal se hai meri fitrat mein jhukna

to phir sajdon se mujh ko aar kya hai

anal-haq se abhi waqif nahin main

mujhe malum kab hai dar kya hai

mujhe hai faKHr main KHaki hun meri

nazar mein nur kya hai tar kya hai

saba se puchhta phirta hun 'aiman'

wafa mein phul kya hai KHar kya hai