badalti rut pe hawaon ke saKHt pahre the

badaltī rut pe havāoñ ke saḳht pahre the

lahū lahū thī nazar daaġh daaġh chehre the

ye raaz khul na sakā harf-e-nārsā pe mire

sadā.eñ tez bahut thiiñ ki log bahre the

vo pūjne kī siyāsat se ḳhuub vāqif thā

vahī chaḌhā.e jo geñde ke zard sehre the

jo bhaa.ī lauT ke aa.e kabhī na dariyā se

unhīñ ke baazū qavī the badan ikahre the

usī sabab se mirā aks TuuT TuuT gayā

us aa.ine meñ ka.ī aur bhī to chehre the

samundaroñ kā vo pyāsā thā aur os thī maiñ

vo abr lauT gayā jis ke lab sunahre the

in āñchaloñ pe koī sajda-rez ho na sakā

ki jin ke rañg bahut shoḳh aur gahre the

samā.atoñ ke dhuñdlakoñ meñ kho ga.e 'shabnam'

vo saare lafz jo palkoñ pe aa ke Thahre the

badalti rut pe hawaon ke saKHt pahre the

lahu lahu thi nazar dagh dagh chehre the

ye raaz khul na saka harf-e-narsa pe mere

sadaen tez bahut thin ki log bahre the

wo pujne ki siyasat se KHub waqif tha

wahi chaDhae jo gende ke zard sehre the

jo bhai lauT ke aae kabhi na dariya se

unhin ke bazu qawi the badan ikahre the

usi sabab se mera aks TuT TuT gaya

us aaine mein kai aur bhi to chehre the

samundaron ka wo pyasa tha aur os thi main

wo abr lauT gaya jis ke lab sunahre the

in aanchalon pe koi sajda-rez ho na saka

ki jin ke rang bahut shoKH aur gahre the

samaaton ke dhundlakon mein kho gae 'shabnam'

wo sare lafz jo palkon pe aa ke Thahre the