badan gulab sa mahke to aag lag jae

badan gulāb sā mahke to aag lag jaa.e

so tū kahīñ se bhī guzre to aag lag jaa.e

zamīn chup hai magar khaultī hai andar se

vo ek lafz bhī bole to aag lag jaa.e

'ajab mizāj kā ātish-parast huuñ maiñ bhī

koī jo aag ko puuje to aag lag jaa.e

maiñ jī rahā huuñ faqat us kī be-ruḳhī ke tufail

vo aañkh bhar ke jo dekhe to aag lag jaa.e

maiñ aise ruḳh pe huuñ sūraj ke sāmne ki agar

zarā sā zāviya badle to aag lag jaa.e

hamāre lafz haiñ māchis kī tīliyāñ 'maz.har'

koī dimāġh se ragḌe to aag lag jaa.e

badan gulab sa mahke to aag lag jae

so tu kahin se bhi guzre to aag lag jae

zamin chup hai magar khaulti hai andar se

wo ek lafz bhi bole to aag lag jae

'ajab mizaj ka aatish-parast hun main bhi

koi jo aag ko puje to aag lag jae

main ji raha hun faqat us ki be-ruKHi ke tufail

wo aankh bhar ke jo dekhe to aag lag jae

main aise ruKH pe hun suraj ke samne ki agar

zara sa zawiya badle to aag lag jae

hamare lafz hain machis ki tiliyan 'mazhar'

koi dimagh se ragDe to aag lag jae