badan ke dosh pe sanson ka maqbara main hun

badan ke dosh pe sāñsoñ kā maqbara maiñ huuñ

ḳhud apnī zaat kā nauha huuñ marsiya maiñ huuñ

bilā-sabab bhī nahīñ yāsiyat tabī.at meñ

azal se ḳhāna-badoshī kā silsila maiñ huuñ

mirā vajūd tumhārī baqā kā zāmin hai

tumhāre an-kahe jazboñ kā aa.ina maiñ huuñ

bahāreñ jis pe hoñ nāzāñ chaman bhī rashk kare

nazar-navāz rutoñ kā vo qāfila maiñ huuñ

bichhaḌ ke mujh se abas manziloñ kī chāhat hai

jidhar bhī jāoge har-samt rāsta maiñ huuñ

un āhaToñ pe mirī vahm kā gumāñ kaisā

maiñ kah chukā huuñ mirī jaan bārhā maiñ huuñ

ġhazal hai koī to maiñ bhī huuñ lāzmī hissa

kisī hayāt ke misre meñ qāfiya maiñ huuñ

tumheñ ḳhabar ho to denā pata mujhe 'zākir'

jise talāsh hai ḳhud kī vo gum-shuda maiñ huuñ

badan ke dosh pe sanson ka maqbara main hun

KHud apni zat ka nauha hun marsiya main hun

bila-sabab bhi nahin yasiyat tabiat mein

azal se KHana-badoshi ka silsila main hun

mera wajud tumhaari baqa ka zamin hai

tumhaare an-kahe jazbon ka aaina main hun

bahaaren jis pe hon nazan chaman bhi rashk kare

nazar-nawaz ruton ka wo qafila main hun

bichhaD ke mujh se abas manzilon ki chahat hai

jidhar bhi jaoge har-samt rasta main hun

un aahaTon pe meri wahm ka guman kaisa

main kah chuka hun meri jaan barha main hun

ghazal hai koi to main bhi hun lazmi hissa

kisi hayat ke misre mein qafiya main hun

tumhein KHabar ho to dena pata mujhe 'zakir'

jise talash hai KHud ki wo gum-shuda main hun