badan ke sare jazire shumar karte hue

badan ke saare jazīre shumār karte hue

maiñ thak gayā huuñ samundar ko paar karte hue

ham aise ahl-e-junūñ bazm-e-āgahī meñ hanūz

qusūr-e-be-ḳhabarī bār-bār karte hue

maiñ apnā 'aks ab āḳhir kahāñ talāsh karūñ

haiñ aa.ine mire chehre pe vaar karte hue

tirī talāsh meñ āḳhir ye din tamām huā

kaTegī raat tirā intizār karte hue

rafū-garī kā hunar siikh hī liyā ham ne

ḳhud apne dil kī ridā tār-tār karte hue

badan ke sare jazire shumar karte hue

main thak gaya hun samundar ko par karte hue

hum aise ahl-e-junun bazm-e-agahi mein hanuz

qusur-e-be-KHabari bar-bar karte hue

main apna 'aks ab aaKHir kahan talash karun

hain aaine mere chehre pe war karte hue

teri talash mein aaKHir ye din tamam hua

kaTegi raat tera intizar karte hue

rafu-gari ka hunar sikh hi liya hum ne

KHud apne dil ki rida tar-tar karte hue