badan ki qaid se bahar Thikana chahta hai

badan kī qaid se bāhar Thikānā chāhtā hai

ajiib dil hai kahīñ aur jaanā chāhtā hai

abhī dikhāo na tasvīr-e-zindagī is ko

ye bachpanā hai abhī muskurānā chāhtā hai

har ek rut nahīñ bhātī hamārī āñkhoñ ko

hamārā ḳhvāb bhī mausam suhānā chāhtā hai

ghuTan ho dil meñ to phir shā.erī nahīñ hotī

ġhazal kā sher fazā shā.irāna chāhtā hai

tire baġhair bhī zinda huuñ dekh le ai dost

ab aur kyā tū mujhe āzmānā chāhtā hai

maiñ in amīroñ kī āñkhoñ meñ yuuñ khaTaktā huuñ

ki mujh ġharīb ko saarā zamāna chāhtā hai

maiñ jaañ nisār karūñ us pe chāhtā huuñ magar

vo āsmāñ se sitāre mañgānā chāhtā hai

in āñdhiyoñ ko yahī ḳhauf khaa.e jaatā hai

'farāz' phir se diyā ik jalānā chāhtā hai

badan ki qaid se bahar Thikana chahta hai

ajib dil hai kahin aur jaana chahta hai

abhi dikhao na taswir-e-zindagi is ko

ye bachpana hai abhi muskurana chahta hai

har ek rut nahin bhati hamari aankhon ko

hamara KHwab bhi mausam suhana chahta hai

ghuTan ho dil mein to phir shaeri nahin hoti

ghazal ka sher faza shairana chahta hai

tere baghair bhi zinda hun dekh le ai dost

ab aur kya tu mujhe aazmana chahta hai

main in amiron ki aankhon mein yun khaTakta hun

ki mujh gharib ko sara zamana chahta hai

main jaan nisar karun us pe chahta hun magar

wo aasman se sitare mangana chahta hai

in aandhiyon ko yahi KHauf khae jata hai

'faraaz' phir se diya ek jalana chahta hai