badan ki rakh se raushan sharara kar ke dekhunga

badan kī raakh se raushan sharāra kar ke dekhūñgā

maiñ apnī jaan ko ab ke sitāra kar ke dekhūñgā

vo tanhā justujū bechain sī rahtī hai āñkhoñ meñ

qayāmat aa bhī jaa.e to gavāra kar ke dekhūñgā

qazā aksar mire kūche se be-parda guzartī hai

use bhī khelte hañste ishāra kar ke dekhūñgā

ye sochā hai lab-e-larzāñ pe rakh kar tishnagī saarī

tujhe bhī ai samundar isti.āra kar ke dekhūñgā

na chhat hogī na dar hogā na sahn-e-yār kā gosha

maiñ shahr-e-āfiyat meñ yuuñ guzāra kar ke dekhūñgā

badan kashtī bhañvar ḳhvāhish irāda bādbāñ jaisā

junūñ-dariyā chalo ḳhud ko kināra kar ke dekhūñgā

safar meñ ḳhair-o-shar ke ba.ad vo manzil bhī aa.egī

jahāñ 'ḳhurshīd' apnā goshvāra kar ke dekhūñgā

badan ki rakh se raushan sharara kar ke dekhunga

main apni jaan ko ab ke sitara kar ke dekhunga

wo tanha justuju bechain si rahti hai aankhon mein

qayamat aa bhi jae to gawara kar ke dekhunga

qaza aksar mere kuche se be-parda guzarti hai

use bhi khelte hanste ishaara kar ke dekhunga

ye socha hai lab-e-larzan pe rakh kar tishnagi sari

tujhe bhi ai samundar istiara kar ke dekhunga

na chhat hogi na dar hoga na sahn-e-yar ka gosha

main shahr-e-afiyat mein yun guzara kar ke dekhunga

badan kashti bhanwar KHwahish irada baadban jaisa

junun-dariya chalo KHud ko kinara kar ke dekhunga

safar mein KHair-o-shar ke baad wo manzil bhi aaegi

jahan 'KHurshid' apna goshwara kar ke dekhunga