بدن کو اوڑھ کے یا بے بدن تماشہ کر

بدن کو اوڑھ کے یا بے بدن تماشہ کر

اداس شہر کے شیریں سخن تماشہ کر

ہجوم گریہ گزیدہ کو اور غم نہ دکھا

اتار کڑیاں پہن پیرہن تماشہ کر

حیات دیکھنے آتے ہیں لوگ رونے نہیں

ہنسی خوشی سے فقیر زمن تماشہ کر

کسی پہ بار جنوں ہے کسی پہ بار حیات

تھکے ہوؤں کے لیے بے تھکن تماشہ کر

مزاج خلقت و خالق بحال ہو جائے

سجا کے خاک مکین عدن تماشہ کر

بڑے نصیب سے ملتا ہے قریۂ گل بھی

اے ریگ صحرا بہ روئے چمن تماشہ کر

جواز خود ہے تماشہ تماشہ کرنے کو

خوشی ہو غم ہو کہ رنج و محن تماشہ کر

سب اپنے اپنے تماشے میں محو ہیں میسمؔ

سو تو بھی آ کے سر انجمن تماشہ کر