badan ko oDh ke ya be-badan tamasha kar

badan ko oḌh ke yā be-badan tamāsha kar

udaas shahr ke shīrīñ-suḳhan tamāsha kar

hujūm-e-girya-gazīda ko aur ġham na dikhā

utaar kaḌiyāñ pahan pairahan tamāsha kar

hayāt dekhne aate haiñ log rone nahīñ

hañsī-ḳhushī se faqīr-e-zaman tamāsha kar

kisī pe bār-e-junūñ hai kisī pe bār-e-hayāt

thake huoñ ke liye be-thakan tamāsha kar

mizāj-e-ḳhilqat-o-ḳhāliq bahāl ho jaa.e

sajā ke ḳhaak makīn-e-'adan tamāsha kar

baḌe nasīb se miltā hai qarya-e-gul bhī

ai reg-e-sahrā ba-rū-e-chaman tamāsha kar

javāz ḳhud hai tamāsha tamāsha karne ko

ḳhushī ho ġham ho ki ranj-o-mehan tamāsha kar

sab apne apne tamāshe meñ mahv haiñ 'mīsam'

so tū bhī aa ke sar-e-anjuman tamāsha kar

badan ko oDh ke ya be-badan tamasha kar

udas shahr ke shirin-suKHan tamasha kar

hujum-e-girya-gazida ko aur gham na dikha

utar kaDiyan pahan pairahan tamasha kar

hayat dekhne aate hain log rone nahin

hansi-KHushi se faqir-e-zaman tamasha kar

kisi pe bar-e-junun hai kisi pe bar-e-hayat

thake huon ke liye be-thakan tamasha kar

mizaj-e-KHilqat-o-KHaliq bahaal ho jae

saja ke KHak makin-e-'adan tamasha kar

baDe nasib se milta hai qarya-e-gul bhi

ai reg-e-sahra ba-ru-e-chaman tamasha kar

jawaz KHud hai tamasha tamasha karne ko

KHushi ho gham ho ki ranj-o-mehan tamasha kar

sab apne apne tamashe mein mahw hain 'misam'

so tu bhi aa ke sar-e-anjuman tamasha kar