badan ko phunkti hain naghma-KHwaniyan pyare

badan ko phūñktī haiñ naġhma-ḳhvāniyāñ pyāre

surūd-e-ishq na chheḌeñ javāniyāñ pyāre

ye barg-e-zard ki bikhre paḌe haiñ rāhoñ meñ

yahī haiñ mausam-e-gul kī nishāniyāñ pyāre

qadam qadam ġham-e-hijrāñ kī be-panāhī meñ

sunā rahī hai mohabbat kahāniyāñ pyāre

koī umiid na hotī to jī bahal jaatā

rulā rahī haiñ tirī mehrbāniyāñ pyāre

charāġh-e-hijr jalātī rahī haiñ saarī raat

sharīk-e-hāl mirī ḳhūñ-fishāniyāñ pyāre

khilā rahī haiñ gul-e-zaḳhm dīda-o-dil meñ

karishma-sāz tirī dilsitāniyāñ pyāre

har ik taraf se lapaktā hai dil pe kauñdā sā

ki tere husn kī haiñ qahar-māniyāñ pyāre

dikhā rahī haiñ tujhe be-shumār ā.īne

mirī nigāh kī ye bad-gumāniyāñ pyāre

tujhe kuchh aur bhī afsurda dekhte haiñ 'nadīm'

tujhe to raas nahīñ shādmāniyāñ pyāre

badan ko phunkti hain naghma-KHwaniyan pyare

surud-e-ishq na chheDen jawaniyan pyare

ye barg-e-zard ki bikhre paDe hain rahon mein

yahi hain mausam-e-gul ki nishaniyan pyare

qadam qadam gham-e-hijran ki be-panahi mein

suna rahi hai mohabbat kahaniyan pyare

koi umid na hoti to ji bahal jata

rula rahi hain teri mehrbaniyan pyare

charagh-e-hijr jalati rahi hain sari raat

sharik-e-haal meri KHun-fishaniyan pyare

khila rahi hain gul-e-zaKHm dida-o-dil mein

karishma-saz teri dilsitaniyan pyare

har ek taraf se lapakta hai dil pe kaunda sa

ki tere husn ki hain qahar-maniyan pyare

dikha rahi hain tujhe be-shumar aaine

meri nigah ki ye bad-gumaniyan pyare

tujhe kuchh aur bhi afsurda dekhte hain 'nadim'

tujhe to ras nahin shadmaniyan pyare