بدن کو توڑتے ہیں بیڑیاں بناتے ہیں

بدن کو توڑتے ہیں بیڑیاں بناتے ہیں

یہ لوگ چاند نہیں روٹیاں بناتے ہیں

طویل شب میں بہ مشکل گزارہ ہوتا ہے

سو چیختے ہیں کئی سسکیاں بناتے ہیں

بڑے کمال کے ہیں کارساز یہ شاعر

صدائیں توڑ کے خاموشیاں بناتے ہیں

چلو کہ شکر ہے اس شہر حبس میں اب بھی

کچھ ایسے لوگ ہیں جو کھڑکیاں بناتے ہیں

کھٹکتے ہوں گے سمندر کی آنکھوں میں ہم لوگ

اسے خبر ہے کہ ہم کشتیاں بناتے ہیں

میں دھوپ بیچتا ہوں اور گھر کے سارے بزرگ

مسافروں کے لیے چھتریاں بناتے ہیں