badan mein jag uThi kapkapahaTen kaisi

badan meñ jaag uThī kapkapāhaTeñ kaisī

maiñ sun rahā huuñ ye fardā kī āhaTeñ kaisī

makīñ ko yaad hazīmat kī dāstāñ hai magar

to us ke ghar meñ haiñ ye jagmagāhaTeñ kaisī

shikast-e-dil kā jo ehsās ab bhī zinda hai

to phir ye hoñToñ pe haiñ muskurāhaTeñ kaisī

vajūd TuuT rahā ho to kaisī naġhmagarī

jo dil sukūñ se na ho gungunāhaTeñ kaisī

farāz-e-dār muqaddar bane ki zahr kā jaam

dayār shauq meñ ab hichkichāhaTeñ kaisī

samajh ke sañg jise chhū liyā badan to na thā

ragoñ meñ dauḌ ga.iiñ sarsarāhaTeñ kaisī

qubūl-e-ām kā mansab jo mere fan ko milā

to dostoñ ko huiiñ tilmilāhaTeñ kaisī

badan mein jag uThi kapkapahaTen kaisi

main sun raha hun ye farda ki aahaTen kaisi

makin ko yaad hazimat ki dastan hai magar

to us ke ghar mein hain ye jagmagahaTen kaisi

shikast-e-dil ka jo ehsas ab bhi zinda hai

to phir ye honTon pe hain muskurahaTen kaisi

wajud TuT raha ho to kaisi naghmagari

jo dil sukun se na ho gungunahaTen kaisi

faraaz-e-dar muqaddar bane ki zahr ka jam

dayar shauq mein ab hichkichahaTen kaisi

samajh ke sang jise chhu liya badan to na tha

ragon mein dauD gain sarsarahaTen kaisi

qubul-e-am ka mansab jo mere fan ko mila

to doston ko huin tilmilahaTen kaisi